وبقيت كل يوم أبص على ولادي وهما بيسألوني:ـ يا ماما، هو بابا مش هييجي ياخدنا؟أرد عليهم:ـ إن شاء الله يا حبايبي. وأول ما يناموا، أعيط لوحدي.
عدى أسبوع، وبعده أسبوعين، وبعد شهر كامل، أحمد لا اتصل بيا ولا سألني محتاجة إيه، ولا حتى حاول يعرف ولاده عاملين إيه. لكن اللي وجعني أكتر إني عرفت إنه جاب ممرضة تخدم أمه، وبقى بيدفع لها مرتب، والممرضة كمان بتساعد في شوية حاجات تخص الولاد.
ساعتها قلت لنفسي: يعني الفلوس موجودة، لكن أنا اللي مكنتش أستاهل حتى مصروف بسيط!
وبدأت أضعف. كنت كل ليلة أمسك الموبايل وأفتح رقمه، وأفضل باصة عليه بالساعات. أقول هكلمه وأقول له حقك عليا، حتى لو أنا مش غلطانة، المهم أرجع بيتي وأشوف ولادي في حــ,,ـــــضن أبوهم.
وبعدين أرجع أفتكر صوته وهو بيقول لي: واحدة تمشي ييجي مكانها عشرة. وأقفل الموبايل. لحد ليلة من الليالي، كنت قاعدة في الصالة، وأمي في أوضتها، ومرات أخويا بتتكلم في التليفون في البلكونة.
سمعتها بتقول:ـ أيوه، هي لسه عندنا، والله مش عارفة هترجع له إمتى. بس أنا بقول لك، لو هو رجعها من غير ما تتنازل عن كل حاجة، هتبقى فتحت على نفسها باب مش هيتقفل. وقفت مكاني، وكنت هخش أقول لها إنتِ مالك بيا، لكن فجأة سمعتها تقول اسم جوزي!
قالت:ـ ما هو أحمد نفسه قال إن أول ما تهدى هترجع له، وإنه مش هيديها مصروف ولا جنيه، علشان متفتكرش إنها لما تسيب البيت تقدر تضغط عليه.
حسيت إن رجلي مش شايلاني. يعني هو كان مستني إني أرجع أترجاه؟ وكان شايف إن طردي من بيتي وسيلة يعلمني بيها درس؟كنت لسه واقفة مصدومة، لما سمعتها تكمل:ـ بس أنا مش فاهمة هو ليه مصمم على الموضوع ده، ما دام يقدر يدفع للممرضة ومرتاح معاها!
هنا قلبي دق بسرعة. إيه علاقة الممرضة بكل ده؟ وليه مرات أخويا بتتكلم كأنها عارفة حاجة أنا معرفهاش؟
رجعت أوضتي بهدوء، وقعدت على طرف السر,,ـــــير، وفتحت رقم أحمد. المرة دي كنت مقررة أكلمه، حتى لو كرامتي اتكسرت، وأقوله يرجعني. لكن قبل ما أتصل، جالي إشعار برسالة من رقم غريب. فتحتها، ولقيت مكتوب:«لو ناوية ترجعي بيتك، متكلميش أحمد قبل ما تعرفي هو قال إيه لأخواته عنك، وليه جاب الممرضة بالذات.
أنا عندي حاجة لازم تعرفيها، بس أوعي تقولي لحد إني كلمتك».فضلت أبص للرسالة وأنا إيدي بتترعش. مين الشخص ده؟
وإيه اللي يعرفه عن جوزي؟ وهل موضوع الممرضة مجرد خدمة لأمه، ولا فيه سر تاني مستخبي ورا كل اللي حصل؟وفجأة، وصلت رسالة تانية، فيها صورة خلت الدم ينسحب من وشي...الدم اتجمد في عروقي، وبصيت تاني على الصورة اللي على شاشة الموبايل وأنا مش مصدقة عيني.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.